Кіраўнік МЗС Беларусі прыняў копіі даверчых грамат пасла Ірана

Фота: belta.by

Міністр замежных спраў Беларусі Максім Рыжанкоў прыняў копіі даверчых грамат Надзвычайнага і Паўнамоцнага Пасла Ірана ў Беларусі Махсена Амід-Замані. Аб гэтым БЕЛТА паведамілі ў прэс-службе МЗС.

Максім Рыжанкоў павіншаваў іранскага дыпламата з пачаткам місіі і пажадаў поспехаў у рабоце.

Бакі абмяняліся меркаваннямі па шырокім спектры актуальных пытанняў беларуска-іранскага палітычнага і гуманітарнага ўзаемадзеяння.

Адзначана паступальная дынаміка развіцця двухбаковых адносін і высокі ўзровень узаемнага даверу.

Міністр і пасол таксама пацвердзілі важнасць захавання высокай інтэнсіўнасці кантактаў на вышэйшым і высокім узроўнях і зацікаўленасць у далейшым паглыбленні дыялогу.

Абмеркаваны графік сумесных мерапрыемстваў на бліжэйшую і сярэднетэрміновую перспектыву, правядзенне якіх павінна надаць дадатковы імпульс развіццю міждзяржаўнага ўзаемадзеяння, забеспячэнню паслядоўнага пашырэння і змястоўнага напаўнення прыярытэтных напрамкаў супрацоўніцтва паміж Беларуссю і Іранам.